Salta al contenuto

Rimasse strasse di Autore Anonimo

Rimazze strasse (par ‘na bela cità)

Ciao Montagna cità medioevale
piena de porteghi ma senza ospedale.
Zale le case, zali i palazi
zala l’erbaza che cresse soi soiazi.

Ciao Montagnana coe merde dei cani
tante drio i muri, come quée dei cristiani.
Cristiani i marcànti, i bancari, i murari
ma tuti in zenòcio davanti ai denàri.

Ciao Montagnana che vende le case
a piòci refati che mucia e che tase.
Adìo Montagnana cità medioevale
co’tanti maestri ma sensa ospedale.

Cità de provincia? Ma no! De campagna
co’machine e ‘gricoli che gira e s’incagna.
Adìo Montagnana, inzegno gran poco!
ma no preocuparte ghe xe la pro l’oco!

Pro Loco? Pro Vobis, botteghe dea piaza,
judei , marcaròi che pa’ on bezo i te maza.
Adio Montagnana , boteghe e batòci
marcànti invidiosi che schicìa piòci.

Fornari , ostarie e tri casolini
indrio co’l progresso cofà marochini .
Adio Montagnana che spera e che sogna,
che dorme e se sveja … e se grata la rogna.

Qua manca “teste” signori miei cari,
e come go dito, in man de boari
no’pole risòrzar le tori e le mura
co’chi da svejàrse ga tanta paura.
Paura de acòrzarse de éssar dei fessi
de aver fato solo i so propri intarèssi.

Se parla, se parla, in comune e par strada
ma l’sior botegaro (‘na meza velada)
vorìa che vegnèsse turisti e miloni
e lù solamente gratàrse i màroni.

Salve bel DOMO pi belo dei bei
co’l prete che pensa a tira solo schèi.
Salute Madona che pianze in agosto,
in sagra i te mete stì gran mena rosto,
‘na sagra de quée che se vede in campagna
co’tombola, pesca, cò sfuòghi e cucagna;
nà bela baraca lì, in parte del Domo
impièna le casse del “don” galantòmo:
‘na bela baraca ‘ntél portégo in parte
e ancora pi’ schèi da che’a stessa parte.
Ciucioti e puoti par parochiàni
che i mete a’la pesca da boni cristiani
e che tàxe se ‘l prete cò i so stessi schèi
l’inciòda sul muro del Domo i cartèi,
cartèi che fa schifo so “l’antica mole”
ma el prete, sa sa, el fa ‘l cazzo che ‘l vole.
E ‘sta Montagnana cò torri e co’mura
vorià aver anca turismo e cultura?

Ma forse col Palio tirèmo la Jente…
ma no, riva solo el fuìn col parente,
a veder che sfila tosate grosière
co’ ociài, brilantina, recìni e bandiere.
Sti tosi che sfila e che mastega goma,
che biastèma , che ùcula e che se manda in mona,
vorìa farne credàr de star lì a figurare
sl gran personaggio? Valà, ‘nde a cagare!
“Sté tenti che passa l’antico soldato,
co’elmo, alabarda e scudo … crociato!
E tiènilo ben alto ch’el scudo, ben drito!”
(se no cossa resta del vecio partito?)
Nel Palio signori c’è democrazia!
Non si fa politica…(ma xè ‘na busìa)

Ciao Montagnana “mia bela dormiente”
Va via l’ospedale, va via tanta jente.
Parte i ufìci, nàsse pochi putini,
ne resta (poarèti) du’pòri stradini,
che scoa da zent’ani la so’bela piaza,
che gira e che ména la vecia ramaza,
ma lassa le merde, le carte, i goldoni
al piè de le mura, dei vèci torioni.

– Le mura xe antiche, la merda fa schèi…
Tolemo la purga da bravi putei,
chissà che “un domani” no’femo i milioni
a culo buson, soto i nostri bastioni-

Ma basta! Pensemo a quei de la piaza:
i bar , le ostarìe … no’ i ciapa ‘na “maza”!
Poareti , che pena, dài femo coléta
Senò, pori cristi, i resta in boléta
e se i alza i prézi de gòti e panini…
i lo fa par el ben de faméja e putìni.
Se po’ come dito, no’ riva i milioni
xé quei de comune ad esser cojòni,
parché par Jutar ‘sti poareti a far schèi
bisòn ca ghe paga chei tre menestréi,
che i sona e che i bala in mezo al listòn
finché ‘a jente beve l’acquèta e limon.

Ma ghemo el prozziùto che ne porta onore
Che ne fa conòssare al consumatore.
El pì bon de tuti, na’ gran lecornìa
ma a Pava purtroppo no’ i sa cos’che ‘a sia
‘sta còssia de mas-cio che co’ tanta boria
Dixèmo a gran voce che a xé ‘a nostra gloria.
I tre majocòti che fa ‘sto prozziùto
co’ dièxe operai o tò , trenta in tuto.
I se lo produxe, i se ‘o incarta, i se lovende
E ala so’ Montagnana no’i ghe assa on bel gnénte.
E anca se spesso el sa de pissìn,
(el lo vende a tri mesi el me casolin)
el nostro prozziùto va difeso e proteto …
“è un prodotto tipico!!! E dàmane on eto!”

Adio Montagnana che passa ‘e giornate
a scoltàr chi che predica in poltrona e savàte
‘sti veci “culoni” de faméja potente
tirchiòni, sapienti ma boni da gnente,
che sta ‘ntei palazi sarà Da zent’ani
che parla de glorie e che sconde i’ingani
che ga tegnù ferma la nostra cità
al tempo de Berta (che mai ga filà).

Autore Anonimo.

l’immagine è tratta da “Lo scatto delle meraviglie”

89
Published inPoesia